謝謝你

岩岩睇完了小馮送給我的生日禮物--sigur ros既紀錄片"Heima"~可以話係超級正!


雖然係0係notebook睇...但係都覺得好正!

呢套野係講sigur ros去完world tour之後就返老家--冰島玩左好多場live。其實呢個舉動冇咩特別，我同水力係北京睇tookoo都係咁，尾站返老家表演。sigur ros既特別之處就係呢十幾場live有3個"唔"，係冰島唔同地方搞、唔收錢同埋事前唔公開!

好得意，佢地試過係一條村仔既山坡度搞，d觀眾好似黎野餐咁，仲有小朋友放風箏；試過係間餐廳度搞，d人著度好似黎食high table咁full suit上陣架；試過係一個廢棄既碼頭隔離一間好似舊廠既建築物度玩；最深刻係去左一個地方，政府話要起水壩，但係佢地反對，覺得影響環境，係果度玩左一場acoustic，唔用電旨因個水壩就係起黎發電~wow~~型呀~~

另外有一場好深刻既係佢地係室內場玩緊一首歌，首歌尾段(我諗都有成2分鐘)係有管樂加入既，之後逐漸細聲，佢地用左一個好現場既效果，就係到果個位既時候有隊管樂團係後台一個一個行出前台，一路行一路行行落台行出門口再行出街都仲一路吹緊~咁逐漸細聲個效果咪做到出黎囉~我覺得真係好犀利!!!條片影住果隊管樂團一路係條街度仲一路吹左好隊時間架~唔使靠咩電子野整管樂效果，唔使較大細聲，用最簡單既方法，搵隊band黎吹就搞掂~

成套戲係不同地方玩既不同歌中間插下團員既說話。雖然講既野唔多，但係內容都幾充實，反映到樂隊諗d咩想做d咩~

Heima=at home.
無論如何，回家就好~

多謝馮~~呵呵~~特別版有唔同concert既full version之後仲有本好靚既相集~~hehe

我返黎啦四

頭先果篇打打下去左同肥莊踩單車...所以擺明呃多篇....

講下食呀又~

係北京都應該食下片皮鴨既~相中既就係liwing生日我地成班去果間四合院餐廳度食既~果間野裝修好靚~而且姐姐服務又好好，教我地點包d鴨之餘仲包埋俾龍哥食~呀~龍哥鍾意果個姐姐仲同左龍哥影相tim~


就係呢張啦嘩哈哈哈哈~~(多謝雲大豪提供!)睇下龍哥幾有英氣，點睇都咁靚仔~~


就係呢間啦~真係幾靚~以為都幾貴，都係每人80幾，我諗係北京黎講都幾貴。果隻鴨都幾唔錯，食左佢話最好食果幾塊皮，入左口之後化左~!
我第二次食鴨就係0係王府井果間全聚德食~我覺得冇上面講果間咁正同埋好似hea好多，醬同配料都冇咁多既...
有一次同patrick佢地講開話我地食果間係咁樣既，之後佢地話：下?我地去總店食，佢有証書啦，個筷子座係隻鴨啦，d野食又貴啦.....等等....同我地去食果間好多地方都唔同...
到底我地係咪去錯左金聚德................



同Eunis慶祝完生日唱完通頂K果朝，行左好一陣子去搵間炸醬面食但係未開，就去左北京既街坊鋪食下d地道早餐~地方係幾污糟既，不過食下佢地既蒸餃都幾ok架wor~地道地道~
其實係北京咁耐都冇咩機會係出面食早餐架，因為朝早9點就上堂，食野都係房食個包就算啦點會晨早走出去食...星期六日?傻既咩星期一至五已經咁早起，星期六日仲唔訓下?香港人嚴重睡眠不足架嘛~


就係食左呢d啦~果碗唔係豆漿，係小麥粥，完全無味既早餐~後面果d餃呀包呀都唔錯~總之就地道啦~



門口仲有檔咁既野，油炸鬼掛係，堅係滾油即炸架!不過冇食到...
果日睇無線新聞，話呢餐館呢，係奧運其間唔俾係條街度擺台，食客一定要係入面食。有個老伯就冇台都要照係鋪出面食，話爽d...唔...我覺得呢個限制真係...冇咩必要...
唔係將本土特色收埋，死跟外國，就叫文明吧...?



呢袋野...冇錯...食得架...係我整親第二日阿mark幫我去飯堂買飯，佢拎返黎既時候都好無奈，唔止我袋飯係咁，佢袋面亦都係咁...其實...點解要咁做呢?用膠袋都係唔環保啦...用個紙盒唔會好d咩?少用一個膠袋環保d定一個紙盒環保d?
不過北京6月都實行左要膠袋俾錢啦，係超市果d我地都會帶定袋去，我有係家樂福買左個好得意既環保袋~4蚊ja都係~
呢個膠袋飯...我都唔記得咩味啦........



整親之後我有好多時間都係自己係近春園既，所以食野都係自己食。因為腳會痛唔走得遠既關係，我好多時都係近春園個餐廳度食。我試過好多味~最鍾意都係個雞髀肉，醬油再加好滑既雞髀肉，整碗白飯飲個可樂~無得頂~~
相中既係木桶飯，有d雞呀蝦呀咁囉~成日食雞係因為戒口冇咩好食，但係我都話呢個飯有蝦...所以係灰灰地架~不過都幾好食唔緊要~
仲有個豆腐都唔錯架~加埋dd湯，正~不過好油.....係咁架啦內地...仲有仲有，餃子好食!10蚊有25隻~真係最抵食係呢樣~
一個人食呢間野都唔平架，要成差唔多30蚊~整親冇計啦~

我返黎啦三

肥莊~搵日同你返去睇下囉，ok?



呢個pizza真係大得恐怖...Eunis佢地食一塊都已經夠飽...大哥竟然食到兩塊再右兩杯清島啤都幾誇...不過佢不嬲都係可以一個人食晒大譚仔既話都唔算好過分既...
呢間叫烏巢既義大利食店呢係0係清華附近既，主要係食大大塊既pizza既，果日去仲有5蚊杯清島，冇得頂~patrick佢地早d去仲有免費啤飲~果度都幾多外國人，都又唔似浦點黎架wor，果度個地點好偏，係個唔知咩宿舍隔離，係旅遊書唔講都唔會去搵果種餐館黎既。
呢個叫垃圾桶既pizza係咩料都有既，都要成一百八十幾人仔，貴野黎架，不過係唔錯既，同埋真係5個人叫人個已經夠晒
我記得去到見到有對女同性戀姐，當我地以一貫0係北京講是非既方法(即係因為當地人唔會識廣東話所以我地就放肆到係人地面前用廣東話講人地是非)講緊佢地既時候，聽到佢地兩個講廣東話...仲要好香港果隻......



講得食pizza唔可以唔講巴貝拉~呢間係五道口既pizza連鎖店呢食到龍哥同阿亮都驚~~哈哈，因為我地成日諗唔到食咩就話去，有一個星期龍哥差d食左4日巴貝拉~點解成日去呢?因為好食得黎抵囉~一個意粉唔使10蚊，一個pizza唔使$30(當然比上面果個細好多啦)，同埋味道唔差呀嘛~
睇下張相咁多人都知道正野值得等啦~其實相呢間係0係西單既，呢個大悅城商場都有好多野食既，有另一間食pizza既叫Mr. pizza既野都幾貴，香港價錢咁啦，所以係人都走晒去巴貝拉~
我地係內蒙返北京之後有成日先搭火車，都要食多次巴貝拉~~哈哈
有好老爺一成不變既感覺



呢間都係0係五道口果邊既(張相都講左...)，主要係食粥既(張相都講左...)，仲要係開24架~(張相差d都講埋...)~~呢間野唔講得少，係北京周圍都見到佢，應該係幾好搵(錢)既一間連鎖~第一次去食係買外賣返去清華既，係行完王府井大街同學又未係好肚餓阿亮又鍾意食粥既關係就試下，7蚊碗皮蛋瘦都唔係話好平，不過的確係整得唔錯既~
又有一次係走入去食，間野裝得幾有中國feel架，我地仲要係上層，大聲叫"服務員"係好爽既一件事黎架~果次仲試過佢d鍋貼，幾好食架煎得，同香港果d好唔同~
正點~

我返黎啦二

去到北京成個月，就梗係周圍去下呀咩旅遊景點呀唔理有咩歷史都走去睇睇咁架啦。呢日係受傷之前我同阿亮龍哥阿mark大哥去圓明園~
一路都聽人講話冇咩好睇係得d爛鬼石，去到我又覺得幾靚架wor其實，又有個展覽係有d 12個生肖頭像既仿製品，有個講解員同我地講話呢d生肖頭係放係西洋樓前面，每一個時辰就會有一隻噴水去中間一個樽度，到左唔知邊個時辰，就12隻一齊不偏不倚咁噴向中間，應該都幾壯觀~
呢d爛石就係西洋樓俾英法聯軍炸左之後個樣。我地搵左個阿叔幫手影呢張相，佢不斷咁叫我地呢個就行左少少、果個就坐右dd，果時心諗使唔使咁麻煩呀大叔我諗住影左團體相ja...點解影完出黎又真係幾靚~哈哈~~



呢張都係0係圓明園影既，係阿mark同緊內地獨有既好風光合照~



話說上到北京第二日我地就去買單車啦。第一日有單車就已經屎忽痕想踩出去搵上年d人話好食既老馬拉面。問左樓下櫃台既服務員，佢就係地圖度圈左個地方，係清華既東面，都幾近奧運村果d野既好似，最重要係佢話踩十幾分鐘就到...
去過老馬既都知，間野係0係清華西門一出轉個灣就係，我地3個結果係東門出之後一路向東踩左兩個幾鐘又係咁問人都搵唔到...想問多一路人就放棄既時候，果個路人又話俾我地聽附近真係有一間...結果又係搵唔到...
回頭既時候去左間我地係水力定唔知龍哥本旅遊書有講既連鎖店度食，叫做李先生美國加州牛肉面大王，聽個名就知勁!成20蚊個面都算啦，仲要香港既牛腩面唔知好食過佢幾多既時候，我地就改左個名叫「李老闆美國加洲契9弟牛肉面大王」.....

誰不知...



我地完左清華去內蒙既時候，首先搭左18個鐘硬座火車去齊齊哈爾再轉車先去到滿州里既。係齊齊哈爾我地出左火車站搵野食既時候，叫到佢...基於去到一個唔熟既地方都係食d連鎖同埋食過唔死得穩陣d既理念之下，我地走左入去...雖然唔知係咪假既(因為便d架...又好似冇咁靚d裝修)...不過我地覺得比北京果間更好食~
另一次係海拉爾送抽水明走既時候，我地又係海拉爾既呢間野食左個早餐...7蚊碗大既牛肉面係唔錯既~
我地發覺係大陸每個火車站附近多數會有一間，真係唔敢入其他野既時候，入去食個面頂下係真係冇問題既~
不過係北京咁多好野食就唔好啦...



係整親十多日後就七一啦，學校安排左呢日去天安門睇升旗，既然我俾左錢，隻腳又好似ok頂到，就決定去啦。終於可以去遠d行下個感覺好好架，攤左係度咁多日真係會悶死。不過最大濟係3點要集合，因為北京日出早。但係去到都係要等好一段時間囉其實，3點我都覺得早左...不過七一好人睇呀真係，我後來先知係黨慶~唔唔...我係好多野都唔知唔識既...
好多人都拎晒相機出黎，好似去睇band show咁~完左之後，我地幾個坐左係天安門廣場，話感受下當年既大學生點樣俾坦克車過既同時，龍哥竟然好似去野餐咁拎d馬仔出黎食...

我地果日頭戴軍帽身穿紅大陽tee去睇升旗，結果俾人睇中左...


借左我地頂帽去影d咁既相...唔...內地既年輕人真係...愛國果份熱情...熱到身體都扭曲埋...
頂帽未洗，有冇人睇岩?



呢間書店叫光合作用，都幾靚架有間cafe仔(雖然未見過佢開)，書唔算好多不過分得幾專，講電影果邊俾我搵到有羅展鳳本"電影X音樂"，又有d文化雜誌都幾好睇，後悔冇買到一本講北京既重建問題既雜誌(因為廿蚊可以買到一本書...)。不過就買左本叫城市畫報既雜誌，咁岩講北京特登買黎睇，除左專題仲有文化版，講書講電影講音樂，仲有小克漫畫~前兩日同馮行榆林既時候，有得賣~都仲係多兩蚊~好野可以keep住睇呀一個月12蚊~(定係雙同刊黎既呢?)



係呢間書店仲搵到my little airport既內地版cd~估唔到佢地既碟可以賣到返大陸咁勁~仲以為維港野真係只會係維港有得睇有得賣~佢地果d咩鐘意丘安娜都唔鐘意哨牙呀、和熊人散步才是正經事呢d咁既歌名，內地既朋友真係幾難會明白...

我聽sigur ros都係咁啦...

我返黎啦一

toto~你就好啦係美國睇coldplay~我覺得佢地新碟唔錯，好想睇佢地玩現場呀~好好享受餘下假期吧~

我返黎啦~~(都成個星期咁耐啦...)

係北京日日都寫日記，返到黎咁多日連打篇日記都懶...搞錯...我諗其中一個原因係唔知點入手啦...係北京成個月再加上去左一個星期旅行，多野打到死啦如果打晒出黎...

所以用返果招啦：放d相再加d解釋咁講啦~yeah~ (係亂黎架啦我又唔跟時序又唔跟重要性總之就係亂咁黎啦)


呢個係龍哥既提議：有一晚龍哥係我地房話不如去睇中超囉~結果一呼三應~我地三個都話好~其實肥屈都話好架，不過佢果朝打黎話「肚痛」，唔緊要啦佢都仲差我地每人一鞭
我地4個人打的去到果個場附近已經感受到有幾好氣氛架啦，我地係即時買飛既，都擔心梗會冇飛，如果冇既話第一時間con龍哥~好彩都係冇晒50ja，30既仲有位~
我地買足打氣用品，頭巾2蚊，細旗都好似係4蚊ja~入到去我地坐都唔係好高~我諗都起碼有7成入座率，唔錯呀~~
氣氛真係好好，d人好幫主隊，叫得都幾勁，特別係球證吹主隊既時候，大家都怒叫「傻b!!~~!」，就咁睇落去「傻b」好似好可愛咁，原來係北京最粗既粗口(真係架我地問過清華既中文系教授丁夏老師架)
下半場主隊終於入波，仲可以守到最後~哈哈好彩好彩~~對面隊青島前後都有個黑人好勁，好似仲有曲波tim(係咪國腳黎架?)
多謝龍哥既安排~


有一日同龍哥同埋阿亮去行王府井，入左書城度我見到本老北京胡同遊就拎上手睇下咁啦(因為我一路都好想去睇下冇咩改建過既老胡同)。見到書入面介紹左一條係王府井附近既，我就邀請佢地兩個同我一齊去搵下啦~都幾偏架呢條胡同，就係前一個街口問人，果個人都話唔知，好彩我地堅持行多個街口ja~
果度係老舍先生既故居黎既~不過去到已經關門啦~~佢屋企對面有個婆婆係度淋緊花，阿亮就過去問係咪冇開呀咁，之後就同佢吹左陣水，佢係老舍先生既舊鄰居黎架，而家退左休食退休金生活。文革果時三十幾歲，係單位裡面都批過人，佢話唔批唔得呀果個時期，好彩係呢條老胡同冇咩俾人破壞過。又話王府井以前係俾皇親國戚行街既地方，係皇旅既商業區；而家都係商業區，不過所有老百姓都行得啦~
同婆婆傾到計幾開心(雖然我聽得明6~7成...)，胡同好靚都好開心~~


不過轉個彎就見到d咁既野...
我地行完一條之後，係轉彎見到有間房個門口特別靚，點知...係拆卸處咁既野黎既!要拆呢頭既胡同...行過少少見到有d已經拆緊...
尋日睇三峽好人既時候都見到好多呢個用白油寫既拆字...係咪成個中國都做緊咁既野?肥莊話大陸保育問題比香港仲嚴重，因為政府做起野上黎冇人可以出聲...
希望問題唔嚴重啦...



想知奧運有幾勁?阿迪達斯為北京奧運每一個項目都做左一對獨特既鞋，呢個計畫叫「專為北京打造」，好誇張呢~

最好笑既係跳水都有：

就係拖鞋啦~wow~~~得諗係整黎搞笑架嘛...
有興趣可以去呢度睇睇：http://2008.adidas.com/gear/gear.aspx



係北京冇架單車真係窄使d架，好似yotsr呢個咁鍾意踩單車既團體呢，係北京生活就簡直係fit到爆呀!見唔見到圖既右下角呢，係北京每條馬路都係有單車專線架，唔使擔心係街踩會太危險(當然都唔係話超安全果隻啦...)~
係清華裡面踩就少不免架啦，因為校園太大，去食飯呀超市呀買雜誌買書咁有架單車旁身方便好多~同埋呢夜晚食完飯踩下單車兜下風都冇話唔爽~
係清華以外踩都係好普遍既事，踩遠d食野就多選擇啦~踩得最甘果日都可以話係上圖果日(阿mark黎架)...我地(Eunis、亮、mark同我)踩左去雍和宮，去果程就個半鐘，唔算d咩呀~不過回程就踩左3個幾鐘...



點解要咁耐呢？因為我地見到一ja奧運既建築就踩鬼左過去啦~上圖就係阿亮踩緊去鳥巢既相啦~6月果個奧運公園已經封左架啦，我地踩到去呢個位可以話係最近架啦~好多都係隔條馬路影埋去，不過呢度近得黎有棟野遮左個景唔靚既...
之後仲封左好多路，所以我地踩錯左ok多路既結果就係踩左3個鐘既回程單車~~

踩單車真係幾好玩~不過...
(以下張相可能有d恐怖，唔嚇得既請飛過佢)


小心d囉...特別係肥仔就唔好懶醒企起身踩，企得多架單車受力自然大，成個腳踏飛左出黎得返條鐵軸就一野刮開左右腳啦...死唔死呀仲要縫成十針...雖然唔係話好痛又冇咩血流出黎，不過呢訓足兩星期先行得，成個trip冇左一半架都...
不過係度真係要多謝大豪阿mark阿亮同龍哥~好照顧我呀我整親果時同埋之後養傷既時間~多謝每一個探過我病既人~哈哈~都幾感動架
當然要多謝小馮，雖然唔係身邊，但係不斷係耳邊陪住我，仲寄左好多野黎，唔...有d野唔使係度講既，係咪?(對唔住呀嚇親你啦都...)
而家冇咩事lu~係多左條虫係度咁囉~

打住咁多先~